Poderíase pensar
sen unha análise en profundidade que unha parella sentimental tería vantaxes á
hora de unírense para formar equipo no pádel. Semellaría que o seu grao de
coñecemento profundo dun membro respecto do outro e a súa complicidade
faríanos máis fortes. Terían condutas entre eles máis previsibles; apoiaríase
mellor o un no outro; o seu pudor ao manifestar os seus estados de ánimo ou de
saúde sería inexistente; coñecerían os estados de ánimo estacionais, os
problemas emerxentes as motivacións, os puntos fortes e débiles da súa
personalidade, etcétera. Etcétera., de maneira moi exhaustiva.
Ben, pero ¿e os
riscos? Teño visto parellas que, aina reunindo todos os factores a favor máis
arriba apuntados, son un artefacto explosivo que, máis tarde ou máis cedo,
acaba por estalar. E cando isto ocorre é mellor non estar preto. As
repercusións máis negativas non son a derrota no partido e a saída do torneo. O
máis lamentable é que esas discusións afectan durante uns días á parella na
vivencia e expresión dos afectos. Pero, ocorre isto dun xeito diferencial? Pode
que si. Hai múltiples causas e non concorren todas necesariamente. Ás veces
abonda cunha relación na que están presentes traza de machismo, sexismo,
autoritarismo dun membro sobre outro con resistencia á submisión, baixa tolerancia
ás críticas construtivas, gusto por recrearse nas críticas destrutivas,
repartición desigual e arbitraria das cargas, baixa autoestima e celos,
egolatría, perda de noción da realidade, incompatibilidade de caracteres en
situación de gran esixencia desde fóra, instinto de posesión que leva a pensamentos
erróneos (“mándoche porque es da miña propiedade”), falta de obxectividade para chegar a recoñecer
o propios déficits, procura no pádel do que non se atopa na relación como
xeradora de frustración, sentimento de xogar por obriga, reproche ao outro
membro por non ocuparse dos fillos durante longas horas de práctica que non se
corresponden cos logros obtidos, etcétera, etcétera, etcétera. Pareceralles que
esaxero, pero así como abondan as parellas que se formaron a partir de integrar
equipo, tamén é frecuente o caso de rupturas sentimentais a partir de discusións
fortes na cancha, ese teatro do mundo que saca a relucir os vicios e virtudes
dos seres humanos con gran detalle.
Parece, pois, que
non é despreciable o risco de mesturar sentimentos íntimos co desempeño dos
roles de competición. O pádel como disparador de incompatibilidades que, se cadra, permanecían ocultas na estructura semiprofunda e que o deporte non fai más ca traer a flote.
© lasrejasopenclub
© Santi Casal, 2017